Álftanes - Grindavík, stutt umfjöllun um leik í Faxaflóamóti

Sæl, öllsömul.

Ætla að fjalla í örfáum orðum um leikinn við Grindavík í dag.

Um hörkuleik var að ræða þar sem við (fjórar stúlkur úr 4. flokki léku með okkur og stóðu sig frábærlega) lékum líklega okkar besta leik í mótinu, fram til þessa. Á brattann var að sækja, fyrirfram, og vorum við búin undir það. Vorum við mjög skipulögð og öguð og náðum tveggja marka forskoti í fyrri hálfleik með tveimur mörkum frá Kristjáni. Grindavík sótti í sig veðrið, náði að skora og stóð 2-3 í leikhléi. Mörkin komu úr langskotum og eftir einstaklingsframtak og erfitt við þau að eiga, þrátt fyrir stórleik Sveins Hjartar í markinu.

Síðari hálfleikur var ekki ósvipaður hinum fyrri, bæði lið náðu að setja góð mörk og skipulag okkar hélt, eins og framast var unnt gegn sterkum mótherja. Erfitt var þó að ráða við langskot Grindavíkur. Hjá okkur skoruðu Emilíana og Gunnar tvö góð mörk. Urðu lyktir leiks 4-8, Grindavík í vil. Eru það góð úrslit.

Heilt yfir er ég afar ánægður með frammistöðuna en við vorum að leika mjög vel, skipulag var til fyrirmyndar og varnarleikur virkilega góður. Skyndisóknir okkar voru hættulegar og létum við fastan leik Grindavíkur ekki slá okkur út af laginu og var afar ánægjulegt var að sjá hvað við héldum mikilli yfirvegun, inni á vellinum. Mikill líkamlegur munur var á milli liða en Grindavík er með marga iðkendur á eldra ári. Kom það bersýnilega í ljós í leik sem þessum en að mínu mati voru það fyrst og fremst líkamlegir burðir sem skópu þennan sigur Grindavíkur. En sem áður segir er ég afar ánægður með frammistöðuna og við lékum sem lið.

Stutt í næsta leik og nú er bara að jafna sig fyrir hann.

Birgir Jónasson þjálfari.

Álftanes - FH, stutt umfjöllun um leik í Faxaflóamóti

Sæl, öllsömul.

Ætla að fara örfáum orðum um leikinn við FH fyrr í dag.

Um hörkuleik var að ræða þar sem við tókum snemma frumkvæðið og náðum að raða inn mörkum á fyrstu tíu mínútum leiks. Eftir það jafnaðist leikurinn þar sem liðin skiptust á að sækja og skora á víxl. Stóð 6-2 í leikhléi.

Síðari hálfleikur var skemmtilegur og jafn og fullt af markvörslum, varnartilþrifum, spili, færum og mörkum litu dagsins ljós. Urðu lyktir 10-5. Mörk okkar gerðu: Daníel 3, Dagur 2, Ívar 2, Viktor 2 og Kristján 1.

Heilt yfir er ég mjög ánægður með frammistöðuna. Það var leikgleiði hjá okkur og við nutum þess að leika knattspyrnu. Úr varð frábær skemmtun þar sem mikið af flottum tilþrifum sáust og bæði lið fengu mikið út úr þessum leik. Það sem ég (og við þjálfarar) var ánægðastur með var hugarfarið, leikgleðin og síðast en ekki síst hraðinn í leiknum en það var aldrei dauður tími. Uppspil okkar var mun betra en í síðasta leik og við misstum knöttinn sjaldan úr því, þrátt fyrir pressu frá mótherja. Mörk okkar komu í öllum regnbogans litum en flest þó eftir góðan samleik. Það er jákvætt.

Byggjum á þessu drengir. Mjög flott hjá ykkur.

Birgir Jónasson þjálfari.

Grótta - Álftanes, stutt umfjöllun um leik í Faxaflóamóti

Sæl, öllsömul.

Ætla að fara örfáum orðum um leik okkar við Gróttu á laugardag. Svolítið var að á brattann á sækja hjá okkur að þessu sinni, einkum á ákveðnum köflum leiks. Það sem aðallega virtist ráða var stærðarmunur á liðnum sem var allmikill. Að sama skapi var líkamlegur styrktarmunur mikill. Þetta gerði okkur erfitt fyrir og fannst mér okkar drengir vera smeykir sökum þessa (sem er alls ekki óeðlilegt).

Góðir spilakaflar sáust þó hjá okkur inni á milli. Náðum við að skapa okkur góð marktækifæri og skora sex mörk. Öll mörkin komu eftir góða og lipra spilamennsku þar sem knötturinn var látinn ganga. Mörk okkar gerðu Daníel 2, Gunnar 2, Dagur 1 og Sveinn 1.

Heilt yfir er ég sáttur við frammistöðuna. Við vissum að þetta yrði erfitt og sú varð raunin. Það sem við hefðum mátt gera betur er að mér fannst uppspil okkar oft og tíðum ganga hægt og drengir voru að nota of margar snertingar. Hægði það á leik okkar. Það sem var vel gert var að drengir héldu haus, þrátt fyrir mótlæti, og héldu áfram að leika knattspyrnu allt fram á síðustu mínútu.

Birgir Jónasson þjálfari.

Álftanes - Þróttur Vogum, æfingaleikur, stutt umfjöllun

Sæl, öllsömul.

Ætla að fara örfáum orðum um æfingaleikinn í gær við Þrótt Vogum.

Byrjuðum þetta ljómandi vel og vorum mun betra liðið. Fljótlega fjölgaði Þróttur um leikmann og lék einum og tveimur fleiri lungann af leiknum. Við það jafnaðist leikurinn og kannski rúmlega það, einkum í síðari hálfleik.

Í fyrri hálfleik var þetta aldrei spurning og lipur tilþrif sáust. Stóð 5-1 í leikhléi, sem þó voru alltof stórar tölur að mínu mati. Annað var uppi á teningnum í síðari hálfleik þar sem jafnræði var með liðum. Urðu lyktir 6-5, okkur í vil. Mörk okkar gerðu Valur (5) og Gunnar (1), að ég held.

Heilt yfir fannst mér frammistaðan sæmileg. Við lögðum leikinn upp þannig að leika með tvær snertingar á eigin vallarhelmingi með hröðu uppspili, að nota tvær snertingar þegar knötturinn ynnist til að sækja hratt og leika með tvær varnarlínur. Ekkert af þessu fannst mér heppnast vel, í hvorugum hálfleik, og heilt yfir notuðu drengir alltof margar snertingar, of lítil hreyfing var án knattar og of lítið flæði var á knettinum.

Drengir í 5. flokki stóðu sig vel en verkefnið var þeim erfitt þar sem stærðar- og styrktarmunur var á liðunum, Þrótti í vil. Heilt yfir fannst mér við of ragir og létum Þrótt „klukka okkur“, þ.e. þar sem við notuðum of margar snertingar vorum við í alltof miklum návígjum úti á vellinum í stað þess að reyna að láta þá elta okkur. Styrkleikar þeirra nýttust því mun betur en okkar.  

Við eigum svolítið í land þegar mótherjinn er sterkur líkamlega. Þurfum að halda áfram og verða betur í stakk búnir að nýta okkar styrkleika í leikjum sem þessum.

Birgir Jónasson þjálfari.