Æfingaleikir gegn Fylki

Sæl, öllsömul.

Á morgun, þriðjudag, leikum við æfingaleiki við Fylki.

Leikirnir fara fram á Álftanesi frá kl. 17:30 til 19:30, eða því sem næst á æfingatíma. Fyrst leikur A-lið og B-lið beint í framhaldi.

Liðsskipan hefur ekki verið ákveðin og mun ekki skýrast endanlega fyrr en á morgun. Í megindráttum verður þó stuðst við þá liðsskipan sem verið hefur fram til þessa. Einhverjar stúlkur munu þurfa að leika hluta úr báðum leikjum.

Af þeim sökum munu stúlkur beggja liða þurfa að mæta kl. 17 í vallarhúsið, fullbúnar til leiks.

Birgir Jónasson þjálfari.

Álftanes - FH 2, stutt umfjöllun um kappleik í Faxaflóa-/Reykjavíkurmóti

Sæl, öllsömul.

Nokkur orð um leik B-liðsins í dag.

Hörkuleikur og í járnum framan af. Lítið af opnum færum og mikill barningur, einkum inni á miðsvæðinu. FH stúlkur líkamlega sterkari og gerðu okkur erfitt fyrir, auk þess sem völlurinn var hrímaður og sleipur. Náðum ekki upp miklu spili og á köflum gekk knötturinn fram og til baka. Rétt fyrir leikhlé náðum við að skora fyrsta mark leiksins, en markið hefði ekki getað komið á betri tíma. Embla skoraði markið.

Í síðari hálfleik vorum við ívið sterkara liðið og náðum að bæta við tveimur góðum mörkum. Þar voru Heiða Lóa og Eva María á ferð. Leikurinn opnaðist aðeins þegar á leið og FH var í raun nær því að minnka muninn en við að bæta við. Sigur okkar var þó fyllilega sanngjarn, en nokkuð stór.

Heilt yfir ég ánægður með frammistöðuna. Náðum að setja þrjú góð mörk, tvö komu eftir „gamm“ og það þriðja eftir frábæran samleik. Skrýtið að segja frá því en í síðasta leik fannst mér við hafa meiri stöðulega yfirburði en sá leikur tapaðist. Í þessum leik var jafnræði en samt 3-0 sigur. Allar stúlkur fengu að spila og við náðum að víxla leikmönnum í stöðum og rúlla þessu vel áfram. Við fengum ekki mörg marktækifæri, mun færri en í síðasta leik, en nú nýttust þau færi sem fengust afar vel. Það sem tökum með okkur úr leiknum er baráttugleðin og viljinn. Mér fannst við vera undir líkamlega í leiknum en við unnum það upp með meiri gæðum en mótherjinn, betri liðsheild, betra skipulagi og áræðni. Frábær sigur hjá ykkur stúlkur!

Birgir Jónasson þjálfari.

Liðsskipan fyrir leik í Faxaflóa-/Reykjavíkurmóti

Sæl, öllsömul. 

Leikið verður í B-liðum í Faxaflóa-/Reykjavíkurmóti á sunnudag. Mótherjar er FH en leikar fara fram á Álftanesi og hefjast kl. 11. Stúlkur þurfa að mæta kl. 10 í vallarhúsið. 

Sömu stúlkur og boðaðar voru í síðasta kappleik hjá B-liði eru nú boðaðar, auk Valdísar. 

Birgir Jónasson þjálfari. 

Álftanes - Valur, stutt umfjöllun um leik í Faxaflóa-/Reykjavíkurmóti

Sæl, öllsömul .

Nokkur orð um leik B-liðsins í dag gegn Val 2 í Faxaflóa-/Reykjavíkurmóti sem fram við hreint frábærar aðstæður á Álftanesi.  

Hörkuleikur og margar af okkar stúlkum (og beggja liða) að stíga sín fyrstu skref í 11 manna knattspyrnu. Það var jafnræði með liðum í byrjun leiks. Smám saman náðum við hins vegar yfirhöndinni og gegn gangi leiksins skoraði Valur eina mark leiksins. Markið kom úr góðu skoti.

Fengum góð marktækifæri í báðum hálfleikum til að jafna metin (og komast yfir fyrr í leiknum) en það tókst því miður ekki. Um tíma í síðari hálfleik var um algjöra einstefnu að ræða en inn vildi knötturinn ekki. Skall oft hurð nærri hælum við mark Vals, t.d. áttum við skot í markslá úr góðu færi. Þá áttum við mikið af skotum á markið, án þess að þau kæmu beinlínis úr marktækifærum.

Heilt yfir fannst mér frammistaðan góð og í raun vonum framar og ekki var að sjá að stúlkur væru að leika í fyrsta sinn á stórum velli. Það voru liprir kaflar hjá okkur, gott spil og stúlkur voru baráttuglaðar og gáfu allt í það að reyna jafna (og auðvitað vinna leikinn). Er ánægur með hve mörg markskot við áttum og hvernig við vorum sífellt að reyna. Eigum auðvitað langt í land á mörgum sviðum og þurfum að æfa atriði eins og hornspyrnur og önnur föst leikatriði, bæði sóknar- og varnarlega. Þá er nokkuð ljóst að við þurfum að æfa markskot á næstu vikum 😊.

Fyrir mestu er að leikurinn var skemmtilegur og allar stúlkur fengu að spila.

Birgir Jónasson þjálfari.