Afturelding/Fram - Álftanes, stutt umfjöllun um leik í Íslandsmóti

Sæl, öllsömul.

Ætla að fara örfáum orðum um leikinn við Aftureldingu/Fram.

Byrjuðum leikinn afar vel og skorðum á fyrstu mínútu leiks með hreint frábæru marki þar sem knötturinn gekk frá aftasta til fremsta manns og Emilía náði að skora. Mótherjinn var hins vegar sterkur og við vissum að á brattann yrði að sækja. Það kom á daginn, auk þess sem lítið féll með okkur.

Sýndum góðan leik á köflum en við ofurefli var þó að etja á marga vísu. Vorum undir í návígjum þrátt fyrir að bíta frá okkur á köflum og réðum illa við kraftinn í liði mótherjans sem hafði á að skipa mörgum stúlkum á eldra ári. Við náðum að skapa okkur svolítið af marktækifærum, einkum í fyrri hálfleik, en alltof oft vantaði að reka smiðhöggið í sóknunum þar sem skot okkar hreinlega drifu ekki á markið. Allt kom því fyrir ekki og við töpuðum fyrir sterkari mótherja.

Heilt yfir var frammistaðan nokkuð góð, t.d. var fyrri hálfleikur vel leikinn. Held að þetta hafi verið okkar besti leikur í sumar og framan af leik stóðum við í þeim. Á þeim tíma leiks féllu hlutirnir ekki fyrir okkur og mótherjinn náði að færa sér það í nyt.

Þetta fer í reynslubankann og ekkert annað unnt að gera en að halda áfram. 

Birgir Jónasson þjálfari.

Álftanes - Grindavík, stutt umfjöllun um leik í Íslandsmóti

Sæl, öllsömul.

Ætla að fara örfáum orðum um leikinn við Grindavík í Íslandsmóti.

Um nokkuð jafnan leik var ræða, einkum úti á vellinum. Augljósir líkamlegir yfirburðir voru þó á liðunum þar sem lið Grindavíkur hefur að skipa nær eingöngu stúlkum á eldra ári. Þetta setti strik í reikninginn því Grindavíkurstúlkur spiluðu fast og eiginlega alltof fast á köflum, að mínu mati.  

Við náðum þó að verjast vel stærstan hluta leiks, skapa okkur fullt af möguleikum sóknarlega og það voru góðir spilakaflar í þessu hjá okkur. Stóran hluta leiks voru við inni í honum þrátt fyrir að hafa tapað honum 1-6. Þær tölur finnst mér ekki gefa rétta mynd af leiknum og gangi leiksins. Mark okkar gerði Vaka en einkar vel var að því marki staðið.

Er heilt yfir ánægður með frammistöðuna. Það sem við hefðum e.t.v. mátt gera betur og þurfum að æfa er að falla aftar á völlinn með öftustu línu þegar ekki næst að setja pressu á leikmann með knöttinn. Þá er auðvitað brýnt að setja ávallt pressu á leikmanninn með knöttinn á ákveðnum stöðum á vellinum, einkum á eigin vallarhelmingi. Þetta verður ekki kennt á einni nóttu og mun lærast smám saman.

Næsti kappleikur er svo á fimmtudag, kl. 16, gegn sameiginlegu liði Aftureldingar/Fram. Leikið verður í efri byggðum Reykjavíkur.

Birgir Jónasson þjálfari.

HK - Álftanes, stutt umfjöllun um leik í Íslandsmóti

Sæl, öllsömul.

Ætla að fara örfáum orðum um leikinn við HK í gær.

Byrjuðum leikinn betur og skoruðum snemma leiks. Fyrri hálfleikur var nánast einstefna en veður setti nokkurt strik í reikninginn, en talsverður vindur var, sem við lékum með í bakið í fyrri hálfleik. Náðum við að setja fjögur mörk í fyrri hálfleik gegn einu frá HK (mörk okkar gerðu Emilía 3 og Vaka 1). Þrátt fyrir þessa stöðu gekk okkur erfiðlega að ráða við knöttinn vegna vinds og mikið var um háloftaspyrnur og ónákvæmar sendingar. Heilt yfir var þó fyrri hálfleikur góður. 

Í síðari hálfleik byrjuðum við betur en smám saman jafnaðist leikurinn. Síðari hluti síðari hálfleiks var hálfgerð einstefna að okkar marki, þar sem við vorum undir alls staðar, og náði HK að setja á okkur fjögur mörk, án þess að við næðum að svara því. Lyktir urðu því 5-4, HK í vil. Get ekki sagt að sigur HK hafi endilega verið verðskuldaður.

Heilt yfir fannst mér frammistaða okkar ekki nægjanlega góð, þrátt fyrir ágæt tilþrif í fyrri hálfleik og góð mörk. Okkur gekk hins vegar illa að halda knettinum niðri á jörðinni og spila honum upp völlinn, eins og við getum gert og höfum gert. Þá fannst mér við falla of mikið niður á sama plan og lið HK, sem var ekki vel spilandi og byggði einkum á líkamlegum styrk. Þá fannst mér við ekki vinna nægjanlega vel úr stöðunni maður gegn manni og vorum einhvern veginn undir í návígjum úti á vellinum.

Við söknuðum nokkurra stúlkna í leiknum en þrátt fyrir það getum við gert betur og það munum við gera í næsta leik. Er sannfærður um það.  

Birgir Jónasson þjálfari.

Álftanes - FH, stutt umfjöllun um leik í Faxaflóamóti

Sæl, öllsömul.

Ætla að fara nokkrum orðum um leikinn við FH í dag.

Lögðum leikinn upp með aðeins öðrum hætti en við höfum verið að gera, þ.e. ætluðum hátt á völlinn og að pressa mótherjann. Það gafst þó ekki betur en svo að í upphafi leiks fengum við á okkur þrjú mörk og lékum ekki vel. Nánar tiltekið komust við varla fram fyrir miðju á fyrstu mínútum leiksins, bæði vegna vinds og pressu frá mótherja. 

Eftir ca 15 mínútna leik fannst mér við eiginlega vakna til lífsins og þá fór þetta að ganga betur. Náðum við upp góðu spili, einkum inni á miðjunni, og náðum skapa okkur nokkur færi. Eitt skilaði frábæru marki sem Vaka skoraði eftir undirbúning frá Veru og Berglindi. Virkilega vel að verki staðið, þar sem við náðum upp góðum samleik í fáum snertingum og spiluðum okkur nánast inn í mark FH. FH náði að skora eitt til viðbótar og stóð 1-4 í leikhléi. Að mínu mati alltof stórt m.v. gang leiks og getu liðanna.

Í síðari hálfleik var þetta 50/50 leikur þar sem mér fannst við betur spilandi og náðum að skapa okkur fullt af marktækifærum, hálffærum og skotfærum. Fór svo að bæði lið gerðu sitt hvort markið en mark okkar gerði Berglind með svonefndum „gammi“, þ.e. fylgdi vel á eftir markskoti. Lyktir urðu því 2-5, FH í vil. Að mínu mati of stórt tap m.v. gang leiks.  

Heilt yfir fannst mér stúlkur leika vel, ef undan eru skildar fyrstu mínútur leiks, og líklega er þetta besta frammistaða liðsins í vetur. Hef eignlega verið að bíða eftir þessu því ég veit að það býr meira í stúlkum en úrslit hafa verið að gefa til kynna. Mér fannst vera barátta í stúlkum, gott flæði á knettinum og á köflum virkilega gott spil, ekki síst fram á við. Með öðrum orðum fannst mér vera hugsun á bak við það sem við vorum að gera og ekkert óðagot. Getum svo sannarlega byggt á þessu. Frábært hjá ykkur stúlkur.

Birgir Jónasson þjálfari.