Æfingin á morgun, setning Rey cup o.fl.

Sæl, öllsömul!

Æfingin á morgun, miðvikudag, verður frá kl. 17 til 18 og af léttara tagi þar sem erfitt mót framundan.

Hið alþjóðlega knattspyrnumót Rey cup verður svo sett annað kvöld, kl. 21, í Laugardalnum (á gervigrasvelli Þróttar). Við ætlum að vera viðstödd þá athöfn en lagt verður af stað frá íþróttahúsinu á Álftanesi kl. 20. Við það tilefni eiga iðkendur að vera í fatnaði merktum félagi. Farið verður á einkabifreiðum og verður raðað niður á bifreiðar á staðnum svo tryggt sé að allar komist á áfangastað. Þeir foreldrar/forráðamenn sem ætla að leggja til bifreiðar þurfa svo að tryggja að allir komist til síns heima en setningarathöfn mun ljúka um kl. 22.

Fyrsti leikur móts er svo á fimmtudag kl. 13, sbr. leikjadagskrá sem þegar hefur verið birt. Mæting er við íþróttahúsið á Álftanesi kl. 11:30 þann dag og er ráðgert að farið verði á Álftanes á ný að leik loknum.

Frekara framhald verður svo rætt á fimmtudag en það ræðst nokkuð af veðri og vindum, t.d. hvort farið verði á Álftanes á milli leikja o.fl.

Iðkendur eru beðnir um að hugsa vel um sig meðan á móti stendur, gæta að hvíld og svefni, matarræði og hafa alla gos- og sykurneyslu í lágmarki (helst enga). Þá er of mikil síma- og tölvunotkun ekki æskileg og a.m.k. tveimur klukkustundum fyrir og einni eftir leik er hún bönnuð, nema nauðsyn krefji. Að mati þjálfara þarf einbeiting að vera eins og best verður kosið og allir utanaðkomandi þættir sem truflað geta hana eru óæskilegir.

Birgir þjálfari.

Rey cup, leikjadagskrá

Sæl, öllsömul!

Vek athygli á að búið er að birta dagskrá leikja inni á vefsíðu Rey cup, www.reycup.is. Um ræðir eftirfarandi vefslóð: http://www.reycup.is/D10/_Files/ReyCup_21.7_Leikjadagskra_2014_drog.pdf.  

Eins og sjá má er um að ræða einn kappleik á fimmtudag, tvo á föstudag, tvo á laugardag og loks einn kappleik um sæti á sunnudag.

Eftir því sem þurfa þykir mun nánari tilhögun verða birt hér inni á heimasíðunni eigi síðar en á miðvikudag en að kvöldi þess dags verður mótið sett.

Birgir þjálfari.

HK - Álftanes: 2-1

Sæl, öllsömul!

Ég ætla þá að fara örfáum orðum um æfingaleik HK og Álftaness sem fram fór í síðustu viku. Um var að ræða æfingaleik þar sem leikin var 11 manna knattspyrna. Fór leikur þessi fram á gervigrasvelli HK í Fagralundi við mjög góðar aðstæður.

Um hörkuleik var að ræða þar sem HK stúlkur voru ívið sterkara liðið en þess ber að geta að þær leika sem A-lið í Íslandsmóti í B-riðli og eru því vanar að leika 11 manna knattspyrnu en, eins og flestir vita, verður hið sama ekki sagt um okkar stúlkur sem hafa litla reynslu af þess háttar knattspyrnu. Framan af einkenndist leikurinn af barningi inni á miðju vallarins þar sem barist var um knöttinn á mjög litlu svæði. Um hálfgert hnoð var að ræða. Var því ekki mikið um áferðafallega knattspyrnu í fyrri hálfleik en ekkert mark var skorað í honum.

Síðari hálfleikur var mun betur leikinn af hálfu beggja liða og mun meira var um samleik. Um miðjan hálfleikinn náðu HK stúlkur að skora fyrsta mark leiksins en þá höfðu þær a.m.k. átt tvö skot í markslá okkar marks og höfðu sótt mun meira. Nokkuð gegn gangi leiksins náðu okkar stúlkur að jafna metin en þar var Birta á ferð með mjög gott mark af stuttu færi eftir undirbúning frá Silvíu og Selmu. Í lok leiks náði HK að skora sigurmark leiksins með góðu marki og þar við sat, þrátt fyrir að síðasta marktækifæri leiksins hefðu okkar stúlkur átt. Lyktir leiksins urðu því 2-1, HK í vil, sem verða að teljast mjög sanngjörn útslit.

Heilt yfir var ég ánægður með leik okkar stúlkna, einkum í síðari hálfleik. Náðust ágætir spilakaflar þar og stúlkurnar lögðu sig allar fram og vörðust vel. Taka þarf mið af því að leikið var við A-lið í 11 manna knattspyrnu sem er vant því að leika leiki af því tagi og það skiptir miklu. Ágætur leikur og góð reynsla fyrir okkar stúlkur.

Birgir þjálfari.

Æfingaleikur við HK

Sæl, öllsömul!

Æfingaleikur verður á morgun, miðvikudag, þar sem att verður kappi við HK. Leikar munu hefjast kl. 17 og verður leikið á grasvellinum í Fagralundi. Leikin verður 11 manna knattspyrna og verður leiktími ca 2 x 30 mínútur.  

Allar stúlkur flokksins eru boðaðar, auk Birtu, Guðnýju og Katrínu í 5. flokki. Stúlkur þurfa að mæta á leikstað hálfri klukkustund fyrir leik, fullbúnar til leiks. 

Birgir þjálfari.