Álftanes - ÍA/Skallagrímur, stutt umfjöllun um leik í Faxaflóa-/Reykjavíkurmóti

Sæl, öllsömul.

Ætla fara nokkrum orðum um leik A-liðsins í dag gegn ÍA/Skallagrími.

Hörkuleikur en kaflaskiptur. Eftir fyrsta mark okkar, um miðjan fyrri hálfleik, og uns við skoruðum síðara mark okkar, nokkuð snemma í síðari hálfleik, var leikurinn í algjörum járnum og við eiginlega fremur undir en hitt, einkum inni á miðsvæðinu.

Vorum þó hættulegri fram á við og vorum að skapa okkur mun fleiri marktækifæri en ÍA/Skallagrímur, sérstaklega í síðari hálfleik og þá gegn vindinum. Sóknarleikurinn skildi liðin að þegar uppi var staðið því mótherjinn var síst lakari úti á vellinum. Eiginlega var hann grjótharður og baráttuglaður (það voru stúlkurnar okkar einnig). Mér fannst nokkuð gott flæði á knettinum en hef þó séð það betra. Mögulega smá ryði um að kenna. Leit samt virkilega vel út m.v. að stúlkur hafa ekki leikið kappleik frá því um mánaðamót ágúst/september. Þá fannst að markskot okkar hefðu mátt vera fleiri, til þess fengum við tækifæri, og þegar þau komu hefðu þau mörg hver mátt vera fastari (munum æfa skot í næstu viku).

Góður 2-1 sigur og stutt á milli, en áður en ÍA/Skallagrímur náði að minnka muninn var dæmt af okkur mark. Mér fannst ÍA/Skallagrímur einu sinni komast nálægt því að jafna metin í stöðunni 2-1, en okkar stúlkur voru í raun mun nær því að bæta við. Sigurinn var því sanngjarn. 

Góð frammistaða hjá stúlkunum heilt yfir og tvö góð mörk litu dagsins ljós frá Hildi og Berglindi (voru reyndar þrjú þar sem eitt var dæmt af sem Hera skoraði). Síðari hálfleikurinn var betri fannst mér þar sem við náðum leiftrandi skyndisóknum. Var afar ánægður með hvernig stúlkur sem komu inn á og fengu tækifæri stóðu sig. Í raun var þetta sigur liðsheildarinnar þar sem frammistaðan var heilt yfir jöfn. 

Birgir Jónasson þjálfari.

Leikir í Faxaflóa-/Reykjavíkurmóti, liðsskipan

Sæl, öllsömul.

Liðsskipan helgarinnar er eftirfarandi:

A-lið:
Berglind
Bjartey (M)
Embla
Freyja
Fríða
Guðrún Birna
Heiða Lóa
Hera R.
Hildur
Hulda
Indíana
Mist
Sara
Silja
Vaka
Valdís
Vera 

B-lið:
Anna Magnþóra
Bjartey
Ella
Embla
Eva María (M/Ú)
Freyja
Fríða
Guðrún (M)
Heiða Lóa
Hera Lind
Hulda
Indíana
Kara
Perla Sól
Salome
Valdís Anna

Vek athygli á að sumar stúlkur eru boðaðar báða dagana. Það eru þær stúlkur í A-liði sem ekki hefja leik á laugardag, en hlutgengisreglur heimila ekki slíkt. Undantekningar frá þessu eru markverðir.

Á laugardag hefjast leikar kl. 12 og þurfa stúlkur að mæta í vallarhúsið kl. 11. Mótherjar er sameiginlegt lið ÍA/Skallagríms.

Á sunndag hefur sú breyting orðið á að leikar hefjast kl. 11. Mæting er í vallarhúsið kl. 10. Mótherjar eru Valur 2.

Birgir Jónasson þjálfari.

Álftanes - Beiðholt, stutt umfjöllun

Sæl, öllsömul.

Ætla að fara örfáum orðum um leikinn við Breiðholt í gær.

Þetta var nokkuð skrýtinn leikur, þar sem okkar stúlkur voru mun betra liðið úti á vellinum fram af, en Breiðholtstúlkur hættulegri fram á við. Það skilaði þeim þremur mörkum á stuttum kafla í fyrri hálfleik. Öll þau mörk voru keimlík þar sem línan okkar var hátt á vellinum og við fengum á okkur skyndisóknir. Náðum aðeins að rétta okkar hlut í fyrri hálfleik með góðu marki frá Emilíu.

Í síðari hálfleik fannst mér aðeins eitt lið á vellinum þar sem við herjuðum á þær frá fyrstu mínútu. Náðum að saxa á forskotið með góðu marki frá Veru, að jafna metin með góðu marki frá Valdísi úr langskoti og loksins að komast yfir með góðu marki frá Emilíu. Breiðholt náði svo að jafna leikinn úr síðustu spyrnu leiksins sem kom úr aukaspyrnu. 4-4 urðu því lyktir leiks.

Heilt yfir er ég ánægður með frammistöðuna. Ég var ánægður með sóknarleik liðsins, náðum að halda knetti vel innan liðsins en vorum e.t.v. ekki nægjanlega beittar í fyrri hálfleik. Það lagaðist til muna í síðari hálfleik. Varnarleikur okkar í fyrri hálfleik var ekki nægjanlega góður, einkum á þeim kafla sem við fengum á okkur mörkin þrjú. Þar klikkaði tvennt, annars vegar náðum við ekki að setja nægjanlega pressu á leikmanninn með knöttinn og hins vegar féll línan ekki til baka að sama skapi, en þetta tvennt vinnur saman. Af þeim sökum náðu Breiðholtstúlkur að stinga knettinum fyrir aftar varnarlínu okkar og tóku okkur kannski svolítið í bólinu, eins og sagt er. Við náðum okkur þó á fætur og rúmlega það.

Við getum lært af þessu. Mögulega vanmátum við mótherjarann og byrjuðum leikinn ekki af nægjanlegum krafti. Við vorum sigurstranglegri fyrir leikinn þar sem við höfðum unnið þær stórt fyrr í sumar og Breiðholti ekki gengið vel í sumar. Það er hins vegar enginn leikur búinn fyrr en búið er að leika hann og það er ekkert gefið. Það þekkjum við því fyrr í sumar töpuðum við t.d. stórt fyrir Aftureldingu/Fram á útivelli en hefðum getað unnið þær í síðari leiknum, þar sem við vorum betur spilandi liðið, sælla minninga.  

Birgir Jónasson þjálfari.  

Síðustu kappleikir, stutt endurgjöf

Sæl, öllsömul.

Vikan hefur verið annasöm hjá okkur, tveir kappleikir Íslandsmóti. Báðir leikir töpuðust, en fremur naumt.

Fyrri leikurinn, gegn Aftureldingu/Fram, var virkilega góður og vel spilaður. Í þeim leik vorum við ógnandi og að skapa okkur góð marktækifæri. Náðum að setja þrjú góð mörk (Emilía, Valgerður og Vaka). Í þessum leik sá maður í reynd framfarir okkar stúlkna en við töpuðum stórt fyrir þessu liði í fyrri umferð (sá leikur var reyndar jafnari en úrslit gáfu til kynna). Vorum t.d. betur spilandi liðið úti á vellinum. Það sem skildi á milli var líkamlegur styrkur (vegna aldurs).

Síðari leikurinn, gegn RKV, var aðeins lokaðri og þar vorum við að leika vel úti á vellinum, án þess að ná að skapa okkur nægjanlega góð marktækifæri. Náðum við að leysa vel úr pressu á okkar vallarhelmingi, að því er virtist nokkuð áreynslulítið. RKV náði að verja mark sitt vel og við náðum ekki að opna þær. Þá réðum við illa við föst leikatriði þeirra. Í þessum leik skildu líkamsburðir einnig á milli, okkar stúlkur voru betur spilandi og tæknilega betri.

Heilt yfir er ég ánægður frammistöðu stúlknanna í leikjunum. Gott skipulag var, uppspil gott, leystum frábærlega úr pressu og það var hugsun á bak við það sem við vorum að gera inni á vellinum. Stúlkurnar hafa að mati okkar þjálfara sýnt miklar framfarir, ekki í síst í sumar. Virkilega gaman að fylgjast með þeim og sjá stígandann.

Það er einn leikur eftir í Íslandsmóti, gegn Breiðholti. Á þessari stundu hefur leiktími ekki verið fastsettur en fyrirhugað er að hann fari fram í næstu viku (beðið er eftir svari frá Breiðholti).

Birgir Jónasson þjálfari.