Æfingaleikur við Keflavík, tilhögun

Sælar, stúlkur. 

Leikum æfingaleik á laugardag kl. 11, gegn Keflavík. 

Mæting er kl. 9:45 í íþróttahúsið. Vek athygli á að vegna klefamála í íþróttahúsinu þurfið þið að nota félagsaðstöðuna til þess að klæðast og notast við sturtuklefa sundlaugarinnar að leik loknum. 

Birgir Jónasson þjálfari. 

Áhugaverð grein um hnémeiðsli

Sælar, stúlkur. 

Vil vekja athygli ykkar á áhugaverðri grein inni á heimasíðu Fótbolta.net um hnémeiðsli og fyrirbyggjandi þjálfun. Sjá: http://fotbolti.net/news/25-04-2017/er-thetta-ekki-komid-nog. Greinin vísar einnig á áhugaverða ritgerð greinarhöfundar um efnið. 

Greinin svarar e.t.v. engum spurningum en vekur lesendur til umhugsunar um mögulegar ástæður tíðra hnémeiðsla. Það eru líklega engar töfralausnir til, en ég hef þó lengi verið þeirrar skoðunar að mjög fyrirbyggjandi sé að leika á gervigrasskóm á gervigrasi, einkum á þurru grasi og grasi innandyra. Þá er ég einnig þeirrar skoðunar að eigi að vera unnt að leika á takkaskóm á gervigrasi þurfi að bleyta yfirborð vallar. 

Birgir Jónasson þjálfari. 

Æfing á morgun, miðvikudag

Sælar, stúlkur. 

Sú breyting hefur verið gerð að við æfum á morgun, miðvikudag, frá kl. 18, en æfing á föstudag fellur niður. 

Birgir Jónasson þjálfari. 

Álftanes - HK/Víkingur, endurgjöf

Sælar, stúlkur.

Stutt endurgjöf um leikinn í gær. Var mjög ánægður með hvernig við byrjuðum leikinn og framan af vorum við betra liðið á vellinum. Eftir að hafa fengið á okkur mark fannst mér leikur okkar fara smám saman niður á við, einkum varnarlega. Um miðjan síðari hálfleik fannst mér allur vindur úr okkur og liðið var einfaldlega sprungið.

Það voru góðir spilakaflar í þessu hjá okkur og hluta leiks fannst mér okkar samleikur betri en HK/Víkings. Við náðum að sækja á nokkuð mörgum mönnum, vorum að skapa okkur hálffæri og fengum talsvert af föstum leikatriðum þar sem við vorum ógnandi. Mark okkar kom einmitt úr einu slíku föstu leikatriði (Saga). Þetta eru afar drjúg mörk og þau koma alltaf. Vonandi verða þau fleiri þegar við getum farið að æfa föst leikatriði með hlýnandi veðri.

Heilt yfir var varnarleikur okkar ekki nægjanlega góður og það varð okkur að falli, a.m.k. að hafa tapað leiknum með fjögurra marka mun (sem mér fannst ekki gefa rétta mynd af gangi leiks). Við ráðum augljóslega ekki vel við að verjast sem lið gegn sterkum liðum, einkum þegar við förum framarlega á völlinn, alltént á þessum tímapunkti. Við skynjum illa línumyndanir og það er ekki nægjanlega mikil hreyfanleiki á okkur í varnarvinnunni.

Munum þurfa að halda áfram að æfa þessi atriði og vera einbeittar að bæta leik okkar án knattar. Þurfum að mæta þessu liði fljótlega aftur í Bikarkeppni KSÍ og þurfum að undirbúa okkur undir það.  

Birgir Jónasson þjálfari.