Sæl, öllsömul!
Við þjálfarar ætlum þá að fara örfáum orðum um leik Gróttu og Álftaness í Íslandsmóti sem fram fór á Gróttuvelli við hörmulegar aðstæður í gærkvöldi, miðvikudag, en mikið rok var og varla stætt á vellinum.
Í fyrri hálfleik léku okkar drengir gegn vindinum og voru mun betra liðið. Gott flæði var á knettinum og náðu drengir að skapa sér allnokkur góð marktækifæri. Inn vildi knötturinn hins vegar ekki. Það voru svo Gróttudrengir sem skoruðu fyrsta mark leiksins gegn gangi leiksins úr góðri skyndisókn. Eftir það fengu okkar drengir nokkur afar góð marktækifæri sem ekki nýttust. Stóð því 1-0 í leikhléi.
Í fyrri hálfleik pressuðu okkar drengir mjög hátt á vellinum en Gróttudrengir voru stórhættulegir og fengu mjög góð marktækifæri. Um miðjan síðari hálfleik jafnaði Atli Dagur metin með stórglæsilegu marki með langskoti utan af velli. Eftir það pressuðu okkar drengir og pressuðu en náðu ekki að færa sér það í nyt. Lyktir urðu því 1-1.
Heilt yfir erum við þjálfarar sáttir við spilamennsku liðsins miðað við aðstæður en ekkert veður var til knattspyrnuiðkunar. Mjög gott spil sást á köflum en áhyggjuefni var hve marktækifæri nýttust illa.
Birgir og Guðbjörn þjálfarar.