Álftanes - Beiðholt, stutt umfjöllun

Sæl, öllsömul.

Ætla að fara örfáum orðum um leikinn við Breiðholt í gær.

Þetta var nokkuð skrýtinn leikur, þar sem okkar stúlkur voru mun betra liðið úti á vellinum fram af, en Breiðholtstúlkur hættulegri fram á við. Það skilaði þeim þremur mörkum á stuttum kafla í fyrri hálfleik. Öll þau mörk voru keimlík þar sem línan okkar var hátt á vellinum og við fengum á okkur skyndisóknir. Náðum aðeins að rétta okkar hlut í fyrri hálfleik með góðu marki frá Emilíu.

Í síðari hálfleik fannst mér aðeins eitt lið á vellinum þar sem við herjuðum á þær frá fyrstu mínútu. Náðum að saxa á forskotið með góðu marki frá Veru, að jafna metin með góðu marki frá Valdísi úr langskoti og loksins að komast yfir með góðu marki frá Emilíu. Breiðholt náði svo að jafna leikinn úr síðustu spyrnu leiksins sem kom úr aukaspyrnu. 4-4 urðu því lyktir leiks.

Heilt yfir er ég ánægður með frammistöðuna. Ég var ánægður með sóknarleik liðsins, náðum að halda knetti vel innan liðsins en vorum e.t.v. ekki nægjanlega beittar í fyrri hálfleik. Það lagaðist til muna í síðari hálfleik. Varnarleikur okkar í fyrri hálfleik var ekki nægjanlega góður, einkum á þeim kafla sem við fengum á okkur mörkin þrjú. Þar klikkaði tvennt, annars vegar náðum við ekki að setja nægjanlega pressu á leikmanninn með knöttinn og hins vegar féll línan ekki til baka að sama skapi, en þetta tvennt vinnur saman. Af þeim sökum náðu Breiðholtstúlkur að stinga knettinum fyrir aftar varnarlínu okkar og tóku okkur kannski svolítið í bólinu, eins og sagt er. Við náðum okkur þó á fætur og rúmlega það.

Við getum lært af þessu. Mögulega vanmátum við mótherjarann og byrjuðum leikinn ekki af nægjanlegum krafti. Við vorum sigurstranglegri fyrir leikinn þar sem við höfðum unnið þær stórt fyrr í sumar og Breiðholti ekki gengið vel í sumar. Það er hins vegar enginn leikur búinn fyrr en búið er að leika hann og það er ekkert gefið. Það þekkjum við því fyrr í sumar töpuðum við t.d. stórt fyrir Aftureldingu/Fram á útivelli en hefðum getað unnið þær í síðari leiknum, þar sem við vorum betur spilandi liðið, sælla minninga.  

Birgir Jónasson þjálfari.  

Síðustu kappleikir, stutt endurgjöf

Sæl, öllsömul.

Vikan hefur verið annasöm hjá okkur, tveir kappleikir Íslandsmóti. Báðir leikir töpuðust, en fremur naumt.

Fyrri leikurinn, gegn Aftureldingu/Fram, var virkilega góður og vel spilaður. Í þeim leik vorum við ógnandi og að skapa okkur góð marktækifæri. Náðum að setja þrjú góð mörk (Emilía, Valgerður og Vaka). Í þessum leik sá maður í reynd framfarir okkar stúlkna en við töpuðum stórt fyrir þessu liði í fyrri umferð (sá leikur var reyndar jafnari en úrslit gáfu til kynna). Vorum t.d. betur spilandi liðið úti á vellinum. Það sem skildi á milli var líkamlegur styrkur (vegna aldurs).

Síðari leikurinn, gegn RKV, var aðeins lokaðri og þar vorum við að leika vel úti á vellinum, án þess að ná að skapa okkur nægjanlega góð marktækifæri. Náðum við að leysa vel úr pressu á okkar vallarhelmingi, að því er virtist nokkuð áreynslulítið. RKV náði að verja mark sitt vel og við náðum ekki að opna þær. Þá réðum við illa við föst leikatriði þeirra. Í þessum leik skildu líkamsburðir einnig á milli, okkar stúlkur voru betur spilandi og tæknilega betri.

Heilt yfir er ég ánægður frammistöðu stúlknanna í leikjunum. Gott skipulag var, uppspil gott, leystum frábærlega úr pressu og það var hugsun á bak við það sem við vorum að gera inni á vellinum. Stúlkurnar hafa að mati okkar þjálfara sýnt miklar framfarir, ekki í síst í sumar. Virkilega gaman að fylgjast með þeim og sjá stígandann.

Það er einn leikur eftir í Íslandsmóti, gegn Breiðholti. Á þessari stundu hefur leiktími ekki verið fastsettur en fyrirhugað er að hann fari fram í næstu viku (beðið er eftir svari frá Breiðholti).

Birgir Jónasson þjálfari.

Umfjöllun um síðustu tvo leiki í Íslandsmóti

Sæl, öllsömul.

Ætla að fara nokkrum orðum um kappleiki vikunnar en í nægu hefur verið að snúast í þessari viku.

Fyrst er það mánudagsleikurinn í Grindavík. Byrjuðum leikinn ekki nægjanlega vel og fengum á okkur þrjú mörk á fyrstu sjö mínútum leiksins. Eftir það var að brattann að sækja. Verð þó að segja að leikurinn var oft og tíðum ekki ójafn úti á vellinum og við náðum alveg ágætum spilaköflum, án þess þó að ná að skapa okkur afgerandi marktækifæri, framan af. Réðum hins vegar illa við þrjár til fjórar stúlkur í liði Grindavíkur og því tapaðist leikurinn stórt. Helst gefa úrslit leiksins til kynna aldursmun en ekki getumun. Heilt yfir var þó frammistaðan ekki nægjanlega góð og við bárum of mikla virðingu fyrir mótherjanum. Að mínu mati fannst mér við vera svolítið ryðguð enda ekki leikið um nokkurt skeið. Vorum e.t.v. ekki alveg tilbúin í þetta verkefni á þessum tímapunkti. Fyrsta tap okkar í tvo mánuði því staðreynd.

Í síðari leiknum á Ísafirði snérist dæmið heldur betur við en um algjöra yfirburði okkar stúlkna var að ræða. Náðum þó e.t.v. ekki að nýta okkur þá yfirburði til fullnustu og framan af fannst mér við of rög við að skjóta á markið. Sköpuðum okkur mikið að tækifærum en náðum ekki að vinna nægjanlega vel úr þeim möguleikum og við vorum of mikið að reyna komast í gegnum miðjuna og þræða knöttinn í gegnum þröngt svæði á síðasta þriðjungi vallar, í stað þess að nota breidd vallar. Að mínu mati virkaði eins og við værum enn ryðguð og gerðum einnig svolítið af tæknifeilum. Fannst það þó lagast þegar á leikinn leið. Uppskárum að endingu góðan og öruggan sigur þar sem Valgerður og Emilía sáu um markaskorun. Heilt yfir var ég ánægður með frammistöðuna og ferðin var hin skemmtilegasta, þrátt fyrir síðbúna heimkomu. 

Byggjum á þessu stúlkur og það er stutt í næstu leiki, Afturelding/Fram á mánudag og RKV á miðvikudag. Báðir kappleikir fara fram heima. Þurfum að halda áfram og stefna á að þróa leik okkar og verða betri.

Birgir Jónasson þjálfari.

Alftanes - HK, stutt umfjöllun um leik í Íslandsmóti

Sæl, öllsömul.

Ætla að fara nokkrum orðum um leik okkar fyrr í dag, gegn HK.

Enn á ný lékum við vel og sýndum okkar bestu hliðar en fyrr í sumar töpuðum við fyrir sama liði í hörkuleik, eftir að hafa leitt í hálfleik, 1-4, eins og einhverjir kannski muna. Nú var annað uppi á teningnum.  

Mér fannst við mun betra liðið frá fyrstu mínútu. Það tók smá tíma að brjóta ísinn en við gerðum þrjú mörk í fyrri hálfleik og fimm í þeim síðari og ógnuðum marki HK allan leikinn. Fengum hins vegar þrjú mörk á okkur en þau komu öll eftir skyndisóknir mótherjans, eftir að við höfðum legið í sókn. Erfitt að verjast slíku en við reyndum það og gerðum það reyndar mjög oft afar vel.

Mörk okkar komu, sem endranær, í öllum regnbogans litum. Allmörg komu þó eftir lipran samleik þar sem við náðum að nýta breitt vallar afar vel. Markaskorun var eftirfarandi: Vera 4, Emilía 2, Berglind 1 og Hildur 1.

Það sem ég er ánægðastur með í okkar leik í dag eru þrjú atriði. Í fyrsta lagi er það leikskipulag sem var mjög gott, bæði varnar- og sóknarlega. Bæði var það var samvinna tveggja til þriggja og hvernig liðið hreyfði sig og hvað við náðum að dreifa spili vel. Í öðru lagi var það einstaklingsframtak en leikmenn voru hugrakkir og mörg frábær tilþrif sáust í dag. Í þriðja lagi var það svo leikgleðin. Hún skein af hverju andliti.

Heilt yfir er ég afar stoltur af frammistöðunni og þeim framförum sem stúlkur hafa sýnt. Frábært hjá ykkur.

Birgir Jónasson þjálfari.